မန္တလေး၊ မတ်- ၁၃- ၂၀၂၆
VOICE OF MYANMAR
မန္တလေးမြို့ ၊ ပြည်ကြီးတံခွန်မြို့နယ်၊ ဇ ရပ်ကွက်၊ ၁၃၃ လမ်းနဲ့ ၁၃၄ လမ်းကြား ၇၈ လမ်း ရန်ကုန် – မန္တလေးလမ်းဟောင်းမှာရှိတဲ့ ကမ္ဘောဇဘဏ်ခွဲ ၄၂ (စက်မှုပန်းခြံဘဏ်ခွဲ) ဓားပြတိုက်ခံရမှုမှာ ငွေသား ၂၃၉၂၀၅၀၀၀ ကျပ် ပါသွားတယ်လို့ သိရပါတယ်။
ဖြစ်စဥ်မှာ Scoopy အနက်ရောင်ဆိုင်ကယ် (နံပါတ်မမှတ်မိ) အမျိုးသား (၂)ဦးဟာ ဆိုင်ကယ်ဦးထုပ် အနက်ဆောင်းထားပြီး အင်္ကျီလက်ရှည်များ ဝတ်ဆင်ကာ သေနတ်အတို(၁)လက်၊ ဓားရှည် (၁)ချောင်း ကိုင်ဆောင်ပြီး ဘဏ်အတွင်းဝင်ရောက်လာခဲ့တယ်လို့ သိရပါတယ်။ အဲဒီနောက်ကောင်တာကနေ (၂၃၉၂၀၅၀၀၀) ကျပ် ကို ယူဆောင်ပြီး ၃ နာရီ ၂၁ မိနစ်မှာ ၇၈ လမ်း ရန်ကုန် -မန္တလေး လမ်းဟောင်းအတိုင်း မြောက်ဘက်သို့မောင်းနှင်ထွက်ခွာသွားတယ်လို့ သိရပါတယ်။
အဲ့ဒီ ဘဏ်ခွဲမှာ ဝန်ထမ်း စုစုပေါင်း ၃၃ ဦး လုံခြုံရေး ဝန်ထမ်း ၅ ဦးရှိတယ်လို့ သိရပြီး ဓားပြတိုက်မှု ဖြစ်စဥ်ကြောင့် လူထိခိုက်မှု ဖြစ်စဥ် မရှိခဲ့ဘူးလို့ သိရပါတယ်။
တရားခံ ဖမ်းမိရေး နယ်မြေခံ လုံခြုံရေးအဖွဲ့တွေ ကြိုးစားနေဆဲဖြစ်ပါတယ်။
လက်ရှိ ဓားပြတိုက်ခံရတဲ့ ဘဏ်ခွဲ ၄၂ ဟာ ပြီးခဲ့တဲ့ ၂၀၂၂ ခုနှစ် ဇူလှိုင် ၁၅ ရက်နေ့ ကလည်း ဓားပြတိုက်ခံရလို့ ငွေကျပ် သိန်း ၁၈၀၀ ဝန်းကျင် ပါသွားတဲ့ ဖြစ်စဥ် ဖြစ်ခဲ့ပါတယ်။
